Este venres atlanTTic participou na expo- feira científica “A ciencia que vén ten nome de muller” que organizou a Unidade de Cultura Científica (UCC), da Universidade de Vigo, na viguesa praza do Berbés. “De Galicia ao espazo!” e “AI para romper barreiras de comunicación”, foron os dous stands nos que o persoal de atlanTTic achegou diversos proxectos e tecnoloxías do Centro á cidadanía. No primeiro deles, participaron os investigadores de atlanTTic Alejandro Camanzo e Fermín Navarro, ademais de Carlos Ulloa, docente de Universidade de Vigo xunto con Navarro. Neste stand, tiveron a oportunidade de amosar maquetas de nanosatélites, como a do proxecto LUME-1, lanzado no 2018 co obxectivo de loitar contra os incendios. No segundo expositor, José Luis Alba e Laura Docío, persoal investigador do Centro e docentes da Escola de Enxeñaría de Telecomunicación da Uvigo, presentaron o proxecto SignaMed, o primeiro dicionario de termos médicos e de saúde accesible en lingua de signos española (LSE). As e os presentes puideron tentar interpretar os termos en lingua de signos para que o sistema desta iniciativa puidera recoñecelos en directo.
Reyes Riveiro e Ara Núñez, de comunicación e promoción de atlanTTic, respectivamente, apoiaron ao persoal investigador alí presente ademais de atender as peticións do público asistente. A continuación podes obter máis información sobre todo o que aconteceu durante a xornada.