Doutor en Enxeñaría de Telecomunicacións (1996) pola Universidade de Vigo, Fernando Aguado é actualmente catedrático no Departamento de Teoría do Sinal e Comunicación da Universidade de Vigo, e profesor adxunto na Norwegian University of Science and Technology (NTNU), en Noruega, apoiando o ‘Small Satellite Programme’ desde 2020, a través dun convenio entre a Universidade de Vigo e a NTNU. Ademais, é responsable desde 2016 de Proxectos Espaciais do Centro Aeroespacial de Galicia (CINAE). As súas principais áreas de interese son a enxeñaría de sistemas para comunicacións espaciais de pequenos satélites e constelacións de pequenos satélites.

Como responsable de actividades espaciais da Universidade de Vigo e CINAE, podemos atopar entre os proxectos que coordinou: XaTcobeo, HUMSAT, FemtoXat, o sector B do satélite SERPENS, DustCube, LUME-1 e WiPTherm.

Foi premiado como Cidadán Distinguido de Vigo en 2012 polo proxecto Xatcobeo, ademais de ser recoñecido como Pontevedrés do ano 2012, na categoría de Ciencia e Universidade. Desde 2018, Aguado é membro de pleno dereito da Academia Astronáutica Internacional (IAA).