“As tecnoloxías claves do 5G: Network Slicing e Edge Computing” é a próxima sesión dun conxunto de actividades relacionadas co 5G impulsadas polo nodo 5G, en colaboración co Laboratorio 5G da Universidade de Vigo, RETEGAL e AMTEGA. Nesta sesión, que terá lugar o xoves 16 de febreiro de 2023 en streaming, participarán os investigadores de atlanTTic David Candal Ventureira, Rubén Pérez Vaz e Alberto Estévez Caldas. O obxectivo é o de presentar os principais paradigmas das redes móbiles de última xeración que permiten ás redes 5G brindar soporte a novos casos de uso con requisitos de taxa de latencia e confidencialidade moi estritos.

Un destes paradigmas é o network slicing, que permite a creación de múltiples redes lóxicas aisladas superpostas sobre a topoloxía física común dun operador. Do mesmo xeito, estudarase o paradigma do edge computing analizando as principais arquitecturas e discutindo as últimas tendencias. Ámbalas dúas tecnoloxías complementaranse cunha demostración práctica.

As persoas interesadas poden realizar a inscrición e obter máis información na seguinte ligazón.