O Centro de Investigación en Tecnoloxías de Telecomunicación da Universidade de Vigo, atlanTTic, celebrou nas últimas horas a xornada Intelixencia Artificial e detección temperá de doenzas neuropsiquiátricas en persoas maiores, na que se presentaron os resultados do proxecto de investigación SAPIENS (Services & Applications for Healthy Ageing). Financiado polo Ministerio de Ciencia e Innovación, coordinado por atlanTTic e coa participación da Universidade de Santiago de Compostela, no proxecto tomaron parte 13 investigadores e investigadoras, que contaron coa colaboración de diversas asociacións e centros de maiores como AFAGA (Asociación de Familiares y Enfermos de Alzhéimer y otras Demencias de Galicia), o Centro de día Parque Castrelos, o Centro Veciñal e Cultural de Valladares e o Coro Senior da UVigo.
Na apertura da xornada participaron Belén Rubio Armesto, vicerreitora de Investigación, Transferencia e Innovación da Universidade de Vigo e Martín Llamas Nistal, director de atlanTTic e integrante do equipo de investigación do proxecto, que presentou ademais de SAPIENS outras iniciativas que se están a levar a cabo no centro no ámbito da detección temperá de enfermidades, como CELIA ou VISIA.
Ferramentas dixitais con IA
Luis Anido Rifón, responsable do proxecto SAPIENS, investigador de atlanTTic e catedrático da Escola de Enxeñaría de Telecomunicación, xunto ao persoal investigador do proxecto, Noelia Lago Priego, Moisés Pacheco Lorenzo e Iván Otero González, foron os encargados de presentar os principais avances e resultados acadados. Ao abeiro do proxecto deseñáronse varias ferramentas tecnolóxicas adestradas con Intelixencia Artificial (IA) e técnicas de Machine Learning, DigiMoca e DigiYesavage, asistentes conversacionais intelixentes tipo Alexa, cos que se realizaron estudos e cribados con persoas maiores e tests de validación da súa usabilidade cos propios usuarios. Unhas probas coas que se miden aspectos como a atención, a velocidade de resposta ou a memoria da persoa que interactúa coa ferramenta.
No acto de presentación dos resultados do proxecto, o equipo de SAPIENS destacou a importancia da detección temperá de enfermidades neurodexenerativas como Alzhéimer e Párkinson ou outros trastornos como a depresión, para unha maior rapidez na intervención da enfermidade, así como unha eficacia do tratamento, que repercute enormemente na calidade de vida das e dos pacientes e reduce o impacto destas doenzas.
Retos das TIC e a detección temperá de deterioro cognitivo
A xornada incluíu unha mesa redonda na que participaron Iván Rarís Filgueira, xerente do Clúster de Saúde de Galicia; Roberto González Novas, responsable de Innovación de DomusVi; César Bugallo Carrera, presidente de FAGAL (Federación Alzhéimer Galicia); Carlos Spuch Calvar, neurocientífico do Instituto de Investigación Sanitaria Galicia Sur e que moderou Martín Llamas. Os participantes na mesa abordaron os principais retos do uso da tecnoloxía e da detección temperá do deterioro cognitivo en persoas maiores, desde diferentes perspectivas, ademais da investigación, como a do ámbito clínico, a das persoas usuarias e das familias, ou a das entidades que ofrecen servizos tanto en residencias como domiciliarios.
Algúns dos retos que puxeron enriba da mesa os participantes na sesión foron a necesidade dunha estandarización no tratamento dos datos dos pacientes e a capacitación do persoal médico no emprego destas tecnoloxías, ao tempo que tamén destacaron a importancia dun proceso de co-creación destas ferramentas dixitais coas propias persoas usuarias.
Fonte: DUVI.