O proxecto Quantum Secure Networks Partnership (QSNP) ten como obxectivo crear un ecosistema europeo sostible en criptografía e comunicación cuánticas. A maioría dos seus socios, que inclúen grupos académicos líderes a nivel mundial, centros de investigación e tecnolóxicos (RTO), spin-offs de compoñentes e sistemas cuánticos, provedores de ciberseguridade, integradores e operadores de telecomunicacións, eran membros dos proxectos insignia europeos de Quantum CIVIQ, UNIQORN. e QRANGE. QSNP reúne así o coñecemento e a experiencia de todas as fases de desenvolvemento tecnolóxico, que van desde deseños innovadores ata o desenvolvemento de prototipos para ensaios de campo.
QSNP estrutúrase en torno a tres piares principais de Ciencia e Tecnoloxía (Science and Technology, ST). Os dous primeiros piares, “Protocolos de próxima xeración” e “Integración”, céntranse na investigación e innovación de fronteira, liderados na súa maioría por socios académicos e RTO. O terceiro piar ST “Casos de uso e aplicacións” ten como obxectivo ampliar o impacto industrial e económico das tecnoloxías QSN e é impulsado principalmente polas empresas. Co fin de acadar os obxectivos específicos dentro de cada piar e garantir que a transferencia de coñecemento e a sinerxía entre eles sexan coherentes e eficaces, QSNP estableceu actividades ST correspondentes ás tres capas principais da cadea de valor tecnolóxica, “Compoñentes e Sistemas”, “ Redes” e “Criptografía e Seguridade”. Este marco permitirá alcanzar o obxectivo final de desenvolver tecnoloxías de comunicación cuántica para infraestruturas europeas críticas, como EuroQCI, así como para os sectores privados das tecnoloxías da información e a comunicación (TIC). QSNP contribuirá á soberanía europea na tecnoloxía cuántica para a ciberseguridade. Ademais, xerará importantes beneficios económicos para toda a sociedade, incluíndo a formación de novas xeracións de científicas/os e enxeñeiras/os, así como a creación de empregos de alta tecnoloxía na industria cuántica en rápido crecemento.