PIXEurope establecerá unha liña piloto de acceso aberto única a nivel mundial para afrontar os principais desafíos tecnolóxicos e de produción asociados aos circuítos integrados fotónicos (PICs). Trátase dunha liña piloto distribuída, baseada na colaboración entre organizacións de investigación de referencia que empregan equipos de última xeración para desenvolver tecnoloxías e procesos innovadores en toda a cadea de subministración dos PICs. Isto inclúe melloras na fabricación monolítica de chips, integración de novos materiais, encapsulado avanzado a nivel de oblea e procedementos de test e análise de fiabilidade de alto rendemento. Estes avances permitirán tamén a integración dos PICs con circuítos electrónicos (EICs), dando lugar a sistemas semiconductores avanzados.
PIXEurope colaborará coa industria europea para transferir estas tecnoloxías e procesos, creando un ecosistema único de investigación e produción que aumente a capacidade de fabricación de PICs. Tamén apoiará ás organizacións de investigación na transición do laboratorio á fábrica, acelerando a comercialización e formando persoal altamente cualificado para garantir que as empresas dispoñan da experiencia necesaria para medrar.
Unha vez en funcionamento, PIXEurope ofrecerá unha ampla variedade de servizos e campañas MPW (multi-proxecto), dende o chip ata o encapsulado e test, xunto con servizos especializados. Ademais, establecerá cursos de formación presenciais e en liña sobre fabricación avanzada de PICs, orientados a 1000 participantes ao ano. En definitiva, PIXEurope fomentará unha comunidade europea activa arredor dos PICs, acelerando a transferencia ao mercado, aumentando a capacidade de produción e reforzando as cadeas de subministración, para que Europa poida aproveitar plenamente o potencial desta tecnoloxía clave